政情:黃國健焗做雙梁和事老

東方日報|2009-07-12
香港青少年領袖發展協會搞咗個「香港模擬立法會」活動,目的係希望培養年輕一代對政治嘅興趣,尋日就請咗幾個立法會議員上去,包括專業議會嘅梁美芬(鼠王芬)、公文袋嘅梁家傑(袋巾傑)同工聯會嘅黃國健(KK)。本來係請佢哋同班中學生分享吓議會文化,點知最後變咗嗌交大會,十足喺立法會開會咁,差啲嚇親啲學生哥。

鼠王芬一開波話絕對唔會認同一啲喺議會入面掟嘢嘅文化,袋巾傑就話依家理性論政空間愈嚟愈窄,一係就好似民建聯譚耀宗咁,一係就好似社民連黃毓民咁,但具體就冇解釋落去。點知呢個時候,鼠王芬忽然發聲,狂轟泛民係「人肉錄音機」,無論討論咩議題,最後都要講返去七一同政改方案,仲大大聲鬧泛民「好奸茅」!畀鼠王芬一激,袋巾傑啲君子風度飛走晒,還拖要佢畀例子,呢兩位法律界人士揸住咪愈拗愈大聲,互不相讓,場內嘅學生都唔知畀咩反應好。

同場嘅KK黃國健都聽到呆咗,但見到鼠王芬同袋巾傑愈講火藥味就愈濃,焗住挺身而出做和事老,話依家嘅立法會唔算暴戾,但就有語言暴力,最後以一句「依家議員間缺乏互信」嚟完結呢個話題,否則都唔知雙梁仲要拗幾耐,難為在場人士嘅耳膜!

[東方日報|2009-07-12]